சிலுக்கு ஸ்மிதாவும்.... - களந்தை பீர்முகமது

சிலுக்கு ஸ்மிதாவும் சுலைமான் ஹாஜியாரும் - களந்தை பீர்முகமது

சமீபத்தில் நான் படித்த புத்தகம், உண்மையை சொல்ல வேண்டுமெனில் புத்தகத்தின் பெயர்தான் என்னை சுண்டியிழுத்தது, யாமறிந்த வரையில் பெரும்பாலும் இசுலாமிய சமூகத்தின் வாழ்க்கை முறைகளையும் அதிலுள்ள பிரச்சினைகளயும் குர்ரான், வஹியைத்தொடமால் எழுதியவர்கள் மிகக்குறைவு, அந்த பிரிவில் வருவது இந்த நூல்.

இது ஒரு சிறுகதை தொகுப்பு, ஒவ்வொரு கதையும் ஒவ்வொரு பரிணாமத்தை காண்பிக்கின்றன. எல்லா கதைகளும் பேசும் பிரச்சினகளும் எல்லா சமுதாயத்திலும் நடைபெறும் விடயங்கள், கதைக்களம் மட்டுமே இசுலாமிய குடும்பங்கள்.

சிலுக்கு ஸ்மிதாவும் சுலைமான் ஹாஜியாரும் என்ற சிறுகதையில் ஒரு ஹாஜியார் எத்தேச்சையாக சிலுக்கு ஸ்மிதாவை சந்தித்ததும் அது தொடர்பாக ஊரில் பேசிய பேச்சுகளும் மிக அழகான நடையில் படைப்பாளி விளக்கியுள்ளார்.

//ஹாஜியாரை சுற்றி நின்றவர்கள் சோகம் திரள சன்னமான குரலில் பலதும் சொன்னார்கள், "அவளா சாகல்ல. எல்லாருமா சேர்ந்து கொன்னுட்டோம்"//
// பெரும் பெரும் நடிகர்கள்,நடிகைகள் இன்றி, புகழ்மிக்க இயக்குநர்கள், தயாரிப்பாளர்கள் இன்றி, உறவினர் இன்றி நகர்ந்த சிறியதான இறுதியாத்திரையில் சோகத்தால் முழுமையாக ஆளப்பட்ட நிலையில் சுலைமான் ஹாஜியார் நடந்து சென்றதை காணமுடிந்தது//

என்ற வரிகள் நடிகைகளின் வாழ்க்கையை விளக்கும் சுருக்கமான வரிகள்

எமக்கு இசுலாமிய சமுதாயத்தினர்களின் வீட்டினுள் வளைய வந்த அனுபவமில்ல(பாய் மாமா வீட்டைத்தவிர), ஆனால் இந்த தொகுப்பில் ஒவ்வொரு கதையும் இசுலாமிய குடும்பங்களினுள் ஊடுறுவி வாழ்க்கையை பார்த்த அனுபவத்தை தருகின்றன.

கிளை நதிகள் கதை ஒரு இழவு வீட்டில் ஒரு ஏழை பெண்ணின் மன ஓட்டத்தை அருமையாக காட்டுகின்றது.

தூரத்து வெள்ளம் கதையை படிக்கும் போது பாய் மாமாவும் அரபி அக்காவும் தான் என் கண் முன் வந்து போனார்கள்

காலவேர்கள் கதையில் எதிர்பாராத சமயத்தில் உருவான கரு, பொருளாதார பிரச்சினையால் அதை கலைக்கமுற்படுவதும் அதனால் அந்த பெண்ணிற்கு ஏற்படும் பிரச்சினைகளயும், அந்த பெண்ணின் மன வேதனையையும் விளக்கியுள்ளார்.

இளஞ்சிறகுகள் கதை தாழ்த்தப்பட்ட இனத்தை சேர்ந்த ஒருவரை ஒரு இசுலாமியப்பெண் காதலித்து வீட்டை விட்டு வெளியேறும் போது ஏற்படக்கூடிய மன ஓட்டத்தை ஒரு மூன்றாம் மனிதனின் பார்வையிலிருந்து கூறியுள்ளார்.

தீயின் விளிம்புகள் என்ற கதையில் ஜமாத் ஹாரம் கட்டுப்பாடு என்று மத்தின் பெயரைச்சொல்லி ஊரில் அடக்குமுறை செய்து கொண்டிருக்கும் ஒரு பணக்கார வர்கத்தின் போலித்தனத்தை கிழிக்கும் நிகழ்வுகளை கூறியுள்ளார் அந்த கதையிலிருந்து சில வரிகள்
// வந்து சேரவேண்டியவர்களெல்லாம் தங்கள் தங்கள் பந்தாவைக் காப்பாற்றுவதற்காகத் தாமதமாய் வருவதே சங்கைக்குறியது என்று கருதிக்கொண்டவர்களாய் சபையில் இந்த நிமிஷம் வரையில் ஆஜர் ஆகாமல் இருந்தார்கள்//

//'ஷரீ அத்'களையும் இதர பிற மார்க்க சம்பந்தமான நூல்களையும் தாங்கள் கரைத்துக் குடித்திருப்பதாகவே இவர்கள் சொல்லிக்கொண்டிருந்தாலும் அது உண்மைதான் என ஊர் ஜனங்களும் அப்பீலே அன்றி ஏற்றுக்கொண்டிருப்பதாலும் வழக்கமான கொடுமைகட்கெள்ளாம் மத முத்திரைகள் குத்தப்பட்டு அங்கீகரிக்கப்படும்//

என்ன ஒரு சத்தியமான வார்த்தைகள் இது மற்ற சமயத்தினருக்கும் பொருந்தும்,

// பொம்பளைங்களை எப்பாடு பட்டாவது அடக்கியே வக்கணும்னு நினைக்கிறதாலதான் நீங்க இப்படியெல்லாம் அனாவசியமா பேசுறிங்க//
என்று ஆணாதிக்க எண்ணத்திற்கு ஒரு குத்து விடுகின்றார்

மனவிழி என்ற கதையில் நகைச்சுவையை இழையோட விட்டுள்ளார் படைப்பாளி

விசை என்றொரு கதை, திருமணம் ஆனதும் பெண்களின் நட்பு வட்டாரம் சுருங்கி தன் கணவனின் நண்பர்கள், அவர்களின் மனைவிகள் என்று ஆகின்றது, ஆனால் அவர்களுடைய பள்ளி, கல்லூரி தோழர்கள் மறக்கப்படுகின்றனர், கணவரின் நட்பு வட்டத்திற்கு அளிக்கப்படும் விருந்தோம்பல்கள் மனைவியின் நட்பு வட்டத்திற்கு அளிக்கப்படுவதில்லை...
// "ஏம்மா இந்த மாமா உங்ககூடவா படிச்சாரு?"
"ஆமா"
" அப்போ ஏம்மா இவங்களைப்பத்தி இதுவரை சொல்லவே இல்ல?"//
// "நீ அந்த மாமாவை நம்ம வீட்டுக்கு வாங்கனு ஒரு வார்த்தை கூட சொல்லலியே ஏம்மா? "
இது சாதாரணமாக சமுதாயத்திலே நடந்து கொண்டிருக்கின்ற விடயம், இதை மிக அழகாக விளக்கியுள்ளார் படைப்பாளி

மொத்தத்தில் சமுதாயத்தின் பல பிரச்சினனகளை கடுமையான வார்த்தைகள் கொண்டு சாடாமல் இயல்பான இசுலாமிய குடும்பங்களை கதைக்களமாகக் கொண்ட ஒரு நல்ல படைப்புதான் களந்தை பீர்முகம்மதுவின் இந்த சிறுகதை தொகுப்பு